ගීයක අරුත - කිරුළ මුතු ලිහී සර සර හඬින් වැගිරෙනා....


මේ ගීතයෙන් කියවෙන්නේ වියපත් නර්තන ශිල්පියෙක් ගැන. පෙර කලාකරුවා තම කලා කුසලතාවයන් ඉදිරිපත් කලේ මුදල් මතම යැපිලා නෙමෙයි. ඔවුන් දන්නා ශාස්ත්‍රය බෙදුවෙත් මුදල් බලාපොරොත්තුව නෙමෙයි. එකල පාරම්පරික කලා ශිල්පියා ජීවත් වූයේ තම කලාවෙන් උනත් ඔවුන් මුදල් පසුපස හඹා ගියේ නෑ. ඔහුට ලැබෙන සොච්චමෙන් ඔහු කෙසේ හෝ ජීවිතය ගැට ගහ ගන්නවා. මෙන්න මේ කතා සාරාංශය තමයි මේ ගීතයෙන් ප්‍රකාශ කරන්නේ.

කිරුළ මුතු ලිහී සර සර හඬින් වැගිරෙනා
සුළු මැදුම් දෙතිත පැටලී ගිගිරි වැලපෙනා
නටනවා නොවෙයි වැහැරුණු දෙපා වෙව්ලනා
තන තන තාන තම් දෙනා
තන තන තාන තම් දෙනා

මෙතනදි කිරුළ කියන්නේ නැට්ටුවාගේ වෙස් තට්ටුව. නර්තනයට ආදරය කරන ශිල්පියාට වෙස් තට්ටුව කියන්නේ හරියට තමන්ගේ ජීවිතේම වගේ. කොටින්ම කියනවනම් වෙස් තට්ටුව දාල තියන පෙට්ටිය (වෙස් පෙට්ටිය) ගෙදර බිම තියන්නෙත් නෑ. අඩුම ගානේ ගැහැණු කෙනෙක්ට අල්ලන්නවත් දෙන්නේ නෑ. වෙස් තට්ටුව පළඳින නැට්ටුවා හරියට රජෙක් වගේ. ඉතින් මෙතන කියන්නේ මේ වෙස් තට්ටුවත් දැන් නැට්ටුවා වගේම වයසට ගිහිල්ලා... ඒකේ අල්ලලා තියන මුතු, පබළු ගැලවි ගැලවි යනවා.... හරියට ඔහුගේ වියපත් ශරීරය වගේ..... ඒ වගේම සුළු මැදුම් දෙතිත කියන්නේ උඩරට නර්තනයේ වැඩි වශයෙන්ම භාවිතා වන තාලයක්. ගොඩක් වෙලාවට වෙස් නැට්ටුවන් භාවිතා කරන්නේ මේ තාලය. ඉතින් නිරතුරුවම ඔහු භාවිතා කරන මේ තාලයත් ඔහුට වරදිනවා. ඇයි ඒ... ?? මොකද ඔහු ඒ තරම් වයසයි. නමුත් ඔහු නටනවා. එකක් ඔහු නර්තනයට ආදරය කරන නිසා....අනෙක එය ඔහුගේ ජීවිකාව නිසා.

"නටනවා නොවෙයි වැහැරුණු දෙපා වෙව්ලනා"... ඔහුගේ නැටුමේ දැන් පෙර තිබූ අලංකාරය නෑ. ඔහුගේ දෙපා වලට පණ නෑ... ඒත් ඔහු නටනවා. ඒ ඔහුගේ පවුල ජීවත් කරවිය යුතු නිසා.

දිලිසෙනා සේම කරලිය දිලෙන්නේ නැති
වන්නමක් සේම සුමිහිරි තානමක් නැති
(සකියණි ගිරෙන් ගිරට පැන යන්නට ජීවිතෙන් බැරි) //

මේ වේදිකාව දිලිසුනාට සුමිහිරි වන්නම් තිබුනට සත්‍ය ඒක නෙමෙයි. මේ කිසිම දේකින් ජිවිත සටන දිනන්න බෑ. මිතුර ඔබ මේ වේදිකාව කොපමණ බැබලුවත්... මිහිරි වන්නම් වලට නර්තනයේ යෙදුනත් ඒ කිසිම දේකින් මේ සටන ජය ගන්න බෑ. 

මෙහිදී "සකියණි ගිරෙන් ගිරට පැන යන්නට ජීවිතෙන් බැරි" යන කොටස දෙවරක් ගායනා කිරීමෙන් ඔහුට එය තදින් පසක් කර දීමට වෙර දරන බවක් පෙන්නුම් කරනවා.

රඟ බිමෙන් බහින විට ගෙයි සන්තකව ඇති
නළල් පට මාල හත් පට සින්න වී ඇති
සකියණි රිදී කාසි සොලවන්නට බෙර පදය මදි

මේ වේදිකාවෙන් ඔබ නික්මෙන විට ඔබ සන්තකව තිබූ සියල්ල ඔබට අහිමි වෙලා. ඔබ නර්තන ක්ෂේත්‍රය මෙච්චර දේවල් කරලා තියෙන්නේ ඔබේ ගෙදර තිබූ දේත් නැති කරගෙන. ඇතැම් විට බිරිඳ සතුව තිබූ රත්තරන් පවා ඔහු උගස් කරන්නට ඇති. මිතුර සෑම දෙයක්ම මුදලින් මනින මේ කුරිරු ලෝකයේ ඔබේ බෙර පදයෙන් ඔබ කෙලෙස නම් යැපෙන්නද ?





(අන්තර්ජාලයෙන් උපුටා ගන්නා ලද්දක් වන අතර, සියලු ගෞරව මුල් රචකයාට හිමිවිය යුතුය)

Share on Google Plus
    Blogger Comment
    Facebook Comment